No Place Like Home
August 13, 2013, 3:57pm

קינדער וואַרגן זיך אָפֿט אין אַמעריקע

Choking Common Among U.S. Kids

  • Print
  • Share Share
בײַ אַ פֿערטל פֿון די פֿאַלן, וואָס מע ברענגט אַ קינד אין שפּיטאָל צוליבן וואַרגן זיך, איז די סיבה — באָנבאָנען

יעדן טאָג אין אַמעריקע פֿירט מען בערך 34 קינדער אין פּקוח־נפֿש־אָפּטייל פֿון שפּיטאָל, ווײַל זיי וואַרגן זיך מיטן עסן, גיט איבער אַ נײַע שטודיע.

„די ציפֿער קאָן זײַן נאָך העכער,‟ האָט דערקלערט ד״ר גאַרי סמיט, וועלכער האָט געאַרבעט אויף דער שטודיע אין „ניישאָנווײַד קינדער שפּיטאָל‟ אין קאָלומבוס, אָהײַאָ. „די שטודיע נעמט נישט אַרײַן יענע קינדער, וואָס מע האָט געבראַכט צו אַ פּריוואַטן דאָקטער אָדער וואָס האָבן אַליין אַרויסגעשפּיגן דאָס עסן, און האָבן דערפֿאַר בכלל נישט באַקומען קיין מעדיצינישע באַהאַנדלונג.‟

די פֿאָרשער פֿון דער שטודיע, וואָס איז אָפּגעדרוקט געוואָרן אינעם זשורנאַל Pediatrics, האָבן אַנטדעקט, אַז באָנבאָנען זענען די פֿאַרשפּרייטסטע סיבה פֿונעם וואַרגן זיך, אָבער די קינדער דערשטיקן זיך אויך מיט וווּרשטלעך, ניס און קערעלעך.

די צאָל פֿון בערך 12,000 קינדער 14 יאָר און ייִנגער, וועלכע באַקומען יעדעס יאָר אַ מעדיצינישע באַהאַנדלונג, נעמט נישט אַרײַן די בערך 57 קינדער, וועלכע שטאַרבן פֿון וואַרגן זיך, האָבן די פֿאָרשער צוגעגעבן.

סמיט און זײַנע קאָלעגן האָבן אַנטדעקט, אַז עופֿעלעך וואָס זענען 1 יאָר אָדער ייִנגער, באַטרעפֿן 38% פֿון אַלע פֿאַלן, וווּ מע ברענגט אַ קינד אינעם פּקוח־נפֿש אָפּטייל צוליבן וואַרגן זיך מיטן עסן; אַ סך פֿון זיי — בעת דעם טרינקען פֿאָרמל אָדער ברוסטמילך.

באָנבאָנעס האָבן גורם געווען מער ווי אַ פֿערטל פֿון די באַזוכן אין פּקוח־נפֿש אָפּטייל.

10% פֿון די קינדער האָט מען געדאַרפֿט לאָזן אין שפּיטאָל נאָכן וואַרגן זיך. די קינדער, וועלכע האָבן זיך געשטיקט מיט אַ וווּרשטל, קערעלעך אָדער ניס, האָבן אַ סך אָפֿטער געדאַרפֿט בלײַבן אין שפּיטאָל, איידער די, וועלכע האָבן זיך געשטיקט מיט אַנדערע עסנס.

„דער עפֿעקטיווסטער אופֿן צו פֿאַרהיטן אַזוינע אַקצידענטן איז אַ בעסערער אויפֿזיכט אויף די קינדער, בעת זיי עסן,‟ האָט באַמערקט ד״ר דזשיימס רײַלי, אַן אָנגזעעענער קינדער־דאָקטער אין ווילמינגטאָן, דעלאַווער, וועלכער האָט זיך נישט באַטייליקט אין דער שטודיע. „עלטערן און אַנדערע אויפֿפּאַסער פֿון קינדער דאַרפֿן זײַן זיכער, אַז דאָס עסן איז גענוג קליין פֿאַר אַ קינד. טרויבן, למשל, דאַרף מען צעשנײַדן אויף דער העלפֿט, אָבער ראָזשינקעס קאָנען זיי עסן גאַנצערהייט.‟


Back to נײַעס פֿאַר בני־בית