Oyneg Shabes
April 30, 2015, 10:52am

שמואל־613

Samuel-613

  • Print
  • Share Share

די טעמע פֿון חסידים, וואָס גייען „אַראָפּ פֿון דרך‟, איז געוואָרן פּאָפּולער, סײַ אויפֿן ביכערמאַרק — עטלעכע בענד זכרונות פֿון געוועזענע חסידים פֿאַרקויפֿן זיך גוט — סײַ אין קינאָ — למשל, דער נײַער פֿילם „פֿעלקיס און מיירע‟.

//yiddish.forward.com/articles/187391/felix-and-meira

איצט איז אַרויס אַ שפּאָגל נײַער קורצער פֿילם „שמואל־613‟, וואָס קומט פֿאָר בײַ די חסידים אין לאָנדאָן. אין פֿאַרגלײַך מיט „פֿעליקס און מיירע‟, וואָס איז בעצם אַ פֿריילעכע געשיכטע אויף דער טעמע „די ליבע קען אַלץ בײַקומען‟, מאַכט „שמואל־613‟ אַ פֿינצטערן אײַנדרוק פֿון לײַדן און דעפּרעסיע. דער יונגערמאַן שמוגלט אַרײַן אין דער היים פּאָרנאָגראַפֿישע מאַגאַזינען, ער קוקט אויף אינטערנעץ־זײַטלעך, וואָס מע טאָר ניט. נאָך דעם ווי ער „שייגעצט אָפּ‟ אין גאַנצן, האָט ער פֿאַרשיידענע פּראָבלעמען מיט משקה, מיט נאַרקאָטיק; אויף דער גאַס שלאָגן אים די כוליגאַנעס, און ער פֿאַלט דורך אין זײַן פּרוּוו זיך צו טרעפֿן מיט מיידלעך. בקיצור, ס’איז שווער צו זײַן אַ שייגעץ.

דער פֿילם איז זייער שיין פֿילמירט: דאָס בילד שאָקלט זיך פּונקט ווי דאָס לעבן פֿונעם העלד. די אַקטיאָרן שפּילן אויך וווּנדערלעך, דער עיקר: שמואל לייבאָוויץ, וואָס שפּילט דעם שטרענגן טאַטן — ער איז אַליין אַ געוועזענער חסיד פֿון לאָנדאָן, און ער רעדט אַ סך ייִדיש אינעם פֿילם; און טעאָ באַרקלעם־ביגס, דער יונגער ענגלישער אַקטיאָר, וואָס שפּילט שמואלן. לייבאָוויץ, איז כּדאַי צו וויסן, איז געזעסן אין תּפֿיסה נײַן יאָר, ווײַל ער האָט געהאַנדלט מיט נאַרקאָטיק; די BBC האָט אַפֿילו געמאַכט אַ דאָקומענטאַר־פֿילם וועגן אים מיט אַ פּאָר יאָר צוריק:

הייסט עס, דער פֿילם שפּיגלט אָפּ אַ געוויסע רעאַליטעט — כאָטש ניט פֿונעם רובֿ געוועזענע חסידים.


Back to עונג־שבת