Oyneg Shabes
May 15, 2014, 11:50am

משוגעים און משומדים

Converts and Crackpots

  • Print
  • Share Share

די צײַט פֿון משוגעת

אַ שדכן שלאָגט פֿאָר אַ גראָבן יונגאַטש אַ זייער רײַך מיידל און אַ שיינס, נאָר אַ מאָל איז זי אַ ביסל אַראָפּ פֿון זינען.

— גוט, — זאָגט דער בחור, — כ’שטים צו.

— מוזסט אָבער וואַרטן אויף דעם טאָג ווען זי איז גענוג משוגע דיך צו נעמען, — ענטפֿערט דער שדכן.

אַ חילוק בלויז מיט אַ טאָג

זײַענדיק אין אַ גרויסער הונגערנויט, האָט זיך אַ ייִד געשמדט. אפֿשר וועט אים גאָט העלפֿן, ס’וועט אים גיין בעסער?

שפּעטער אַ יאָר, צוויי, טרעפֿט אים זײַנער אַן אַלטער פֿרײַנד.

— נו, יאַשקע (פֿריִער יאָשקע), ווי גייט’ס אַצינד, בעסער ווי אַ געשמדטער?

— ניט פֿיל בעסער, — ענטפֿערט ער, — נאָר מיט איין טאָג: פֿריִער האָב איך ניט געהאַט אויף שבת, הײַנט האָב איך ניט אויף זונטיק.

אַן אײַזערנער יוביליי

אַ ייִד זאָגט צום חבֿר: דו ווייסט, איך פּראַווע מאָרגן מײַן אײַזערנעם יוביליי.

— ווי קומסטו צו דעם יובילייי אַצינד? — פֿרעגט דער חבֿר.

— אַז איך האָב אויסגעהאַלטן פֿון מײַן ווײַב 25 יאָר און לעב נאָך, בין איך שטאַרקער פֿון אײַזן.

מע מאַכט אַ לעבן פֿון נסים

אַ ייִדישער קרעטשמער אין אַ פּויליש דאָרף האָט ניט געהאַט קיין פּרנסה. דער גלח פֿונעם זעלבן דאָרף האָט זיך אויך באַקלאָגט אויף זײַן אָרעמקייט. האָבן זיי זיך צונויפֿגערעדט, און אין קלויסטער ווערט אַנטדעקט אַ הייליק בילד, וואָס פֿאַרגיסט טרערן, היילט קראַנקע, גיט צו עקרות קינדער, חתנים צו מיידלעך, און נאָך וווּנדער. איז אין דאָרף אַרײַנגעקומען פּרנסה.

אַ פּויער קומט פֿון אַ צווייטן דאָרף בעטן הילף פֿון דעם וווּנדערבילד. פֿאַרפֿאָרט ער צום ייִדן אין קרעטשמע און פֿרעגט אים:

— איז דאָס אמת, אַז דאָס הייליקע בילד העלפֿט מענטשן?

— געוויס, — ענטפֿערט דער קרעטשמער, — איך ווייס אַליין פֿון צוויי מענטשן וואָס זײַנען געהאָלפֿן געוואָרן…


Back to עונג־שבת