Vayter
April 19, 2013, 4:50pm

וויצן

Jokes

פֿון גענאַדי עסטרײַך

  • Print
  • Share Share

אַ ייִד איז געקומען צו זײַן זונס מלמד מיט אַ טענה:

„וואָס האָט איר גלײַך גענומען לערנען מיט אים קדיש? איך קלײַב זיך נאָך ניט שטאַרבן.‟

„זאָרגט זיך ניט. אַזוי ווי ער לערנט עס, האָט איר נאָך גענוג צײַט אויף דער וועלט.‟

משהן האָט מען געהאַלטן פֿאַר אַ קלוגן ייִד. פֿרעגט בײַ אים אַ שכן:

„זאָגט מיר, ר׳ משה, איז עס ריכטיק, אַז טאָמער אַ רעפֿטל ברויט איז אָנגעשמירט מיט פּוטער, פֿאַלט עס תּמיד מיט דער פּוטער אַראָפּ?‟

„יאָ, ס‘איז טאַקע אַזוי.‟

„אָבער בײַ מיר איז נעכטן אַ רעפֿטל ברויט געפֿאַלן דווקא מיט דער פּוטער אַרויף. וואָס מיינט עס?‟

„דאָס מיינט, אַז איר האָט עס אָנגעשמירט ניט פֿון דער ריכטיקער זײַט.‟

בײַ אַ ייִד איז פֿאַרפֿאַלן געוואָרן די פֿרוי. איז ער געקומען אין דער היגער פּאָליציי צו בעטן, מע זאָל זי געפֿינען. האָט מען אים דאָרטן געבעטן, ער זאָל פֿאַר זיי אויסמאָלן ווי זײַן פֿרוי זעט אויס. האָט ער זיי געזאָגט:

„גוט, איך וועל עס טאָן, אָבער מיט אַ תּנאַי — איר זאָלט עס איר ניט ווײַזן נאָך דעם, ווי איר וועט זי געפֿינען.‟

„האַלאָ, מײַן טײַערער! קענסטו רעדן איצט?‟

„יאָ, מײַן טײַערע, איך קען רעדן איצט.‟

„אויב אַזוי, טאָ הער מיך אויס.‟

„מאַדאַם טראַכטענבערג, איך האָב געהערט, אַז אײַער טאָכטער האָט חתונה.‟

„יאָ, זי האָט חתונה — ביסלעכווײַז.‟


Back to ווײַטער