Oyneg Shabes
June 27, 2013, 5:01pm

רבנישע חכמות און גלײַכװערטלעך

Rabbinic Jokes and Sayings

  • Print
  • Share Share

דער מלבי”ם האָט געזען אַ ייִדן עסן חזיר, זאָגט ער צו אים:

— דו ביסט גרעסער פֿונעם רמב”ם: ער װײסט ניט דעם טעם פֿונעם איסור צו עסן חזיר און דו װײסט יאָ דעם טעם…

אַן אמתער יסוד

אין אַ שטעטל פֿון גרױס מחלוקת צװישן פּאַרטײען האָט דער רבֿ געדרשנט:

„אױף דרײַ זאַכן שטײט די װעלט, אױף דין, אמת און שלום‟, זאָגן די חכמים. די אַלע זאַכן פֿעלן דאָ. אױף װאָס זשע באַשטײט דאָס שטעטל? אַן אַנדער מין אמת — װאָס אײנער באַרעדט דעם צװײטן — אױף דעם אמת שטײט אונדזער שטעטל.

אַ טראַסק אין די צײן

אַן אַנטיסעמיט האָט אַמאָל געפֿרעגט דעם מלבי”ם:

— ס’שטײט: פֿאַר אַ תּלמיד־חכם דאַרף מען אױפֿשטײן און פֿאַר אַ הונט זיך זעצן. װאָס טוט מען, אַז מ’באַגעגנט אַ רבֿ און אַ הונט?

— לאָמיר בײדע אַרױסגײן אין גאַס, װעלן מיר זען װי די מענטשן זײַנען זיך נוהג, — האָט דער גאָון געענטפֿערט.

121###. דער קלער פֿון אַ רבי

אַ חסיד איז אַמאָל געפֿאָרן צום קאַרלינער רבי. אױפֿן װעג האָט ער זיך אָפּגעשטעלט בײַם מתנגדישן גאון ר’ פּינחס מיכאל.

— װוּהין פֿאָרסטו? — פֿרעגט אים דער רבֿ.

— איך פֿאָר קײן קאַרלין צום רבין, — ענטפֿערט דער חסיד.

— און ביז קאַרלין געפֿינסטו ניט קײן רבי?

— איך בין אַ יודע־מחשבֿות, און װײס, אַז ס’איז ניטאָ.

— אױב דו ביסט אַ יודע־מחשבֿות, — פֿרעגט דער רבֿ, — טאָ זאָג זשע מיר, װאָס איך דענק איצטער?

— איר קלערט אָן (“שױתי ה’ לנגדי תּמיד”) גאָט.

— נײן, — לאַכט דער רבֿ,— וועגן דעם האָב איך ניט געקלערט.

— אָט טאַקע דערפֿאַר פֿאָרן מיר קײן קאַרלין, — איז געװען דער ענטפֿער פֿונעם חסיד.


Back to עונג־שבת