No Place Like Home
September 4, 2015, 2:27pm

קלוגע עצות פֿון טאַטע־מאַמע

Clever Advice From Moms and Dads

  • Print
  • Share Share

1. אויב איר זענט שוין מיד פֿון אויפֿהייבן די „לעגאָ‟־שטיקלעך, וואָס וואַלגערן זיך כּסדר אויף ד׳רערד, קויפֿט (אָדער נייט צונויף) זייער אַ גרויסן זאַק, געמאַכט פֿון אַ שטאַרקער סחורה — לײַוונט, למשל — וואָס ציט זיך צונויף מיט אַ שטריק. די קינדער קענען אונטערלייגן דעם זאַק אונטער זיך, איידער זיי הייבן אָן בויען זייערע סטרוקטורן.

ווען זיי ענדיקן די שפּיל, דאַרפֿן זיי בלויז צונויפֿציִען דעם שטריק אויפֿן זאַק, און אַלע „לעגאָ‟־שטיקלעך וועלן במילא אַרײַנפֿאַלן אינעם זאַק.

2. ניצט אויס דאָס ליידיקע אָרט הינטער דער טיר: באַשטעלט (אָדער בויט אַליין) שמאָלע הילצערנע פּאָליצעס, אויף וועלכע מע קען אויסשטעלן די קינדער־ביכלעך. היט זיך אָבער, אַז די קינדער זאָלן אַליין נישט קריכן אויף די פּאָליצעס. דאָס האָלץ איז טאַקע גענוג שטאַרק צו האַלטן די ביכלעך, אָבער בשום־אופֿן נישט פֿאַר קליינע „מאַלפּעלעך‟!

    

3. אויב אײַער קינד פֿאַרמאָגט אַ סך קליינע ליאַלקעס — ווי, למשל, די מאָדעלקעס פֿון דער „באַרבי‟־סעריע — קענט איר זיי אַלע האַלטן אויף אַן אָרט דורך אויפֿהענגען אַ שוך־האַלטער אויף דער טיר, און אַרײַנשטעקן אַ ליאַלקע אין יעדער קעשענע. דאָס וועט, ערשטנס, ווײַזן די קינדער ווי גרינג עס איז צו געפֿינען זייערע ליאַלקעס ווען מען האַלט זיי אַלע אויף איין אָרט, און צווייטנס, גיבן זיי די געלעגנהייט צו באַקוקן זייער גאַנצע זאַמלונג מיט איין בליק.


Back to נײַעס פֿאַר בני־בית