No Place Like Home
February 25, 2014, 5:42pm

בריוו פֿון אַ לייענער

Letter from a Forverts Reader

  • Print
  • Share Share

נאכן לייענען אײַער אַרטיקל וועגן „דײַעט קאָוק‟, קען מען מיינען, אַז די שאָדן פֿון „דײַעט קאָוק‟ איז עפּעס דאָס זעלביקע אָדער רעלאַטיוו דאָס זעלבע ווי עכטע „קאָוק‟. און דאָס איז אַן עוולה, ווײַל איר ווילט דאָך נישט טראָגן דאָס אַחריות פֿון מענטשן, וואָס גייען עס לייענען און צוריקפֿאַלן צו עכטע „קאָוק‟, און לײַדן אויף דיאַבעט (צוקער־קרענק).

„דײַעט קאוק‟ איז זיכער געזינטער, נעמענדיק אין באַטראַכט, אַז ס׳רובֿ מענטשן טרינקען דאָס, ליידער, צוליב איבערוואָגיקייט. דאָס איז דאָך אַ געזונטהייט־נײַעס, נישט סתּם עפּעס אַ לשון־הרע. שוין, זײַט געזונט, און אַ דאַנק פֿאַרן לאָזן מיך רעדן.

אַ לייענער פֿון ברוקלין

איר זענט גערעכט, אַז סאָדע מיט צוקער איז אַ סך ערגער ווי דיעטישע סאָדע. בײַ מענטשן וואָס טרינקען יעדן טאָג 1־2 פּושקעס סאָדע, שטײַגט ממשותדיק די ריזיקע פֿון צוקער־קרענק, האַרץ־פֿעלער, איבערוואָגיקייט און הויכן כאָלעסטעראָל. ס׳איז נישט קיין ספֿק, אַז אַרײַננעמען אַזוי פֿיל צוקער פֿאַרקירצט דאָס לעבן, און דערפֿאַר איז מער געוווּנטשן צו טרינקען דיעטישע סאָדע ווי די געוויינטלעכע סאָדע.

אָבער בלויז ווײַל דיעטישע סאָדע האָט נישט קיין קאַלאָריעס אָדער צוקער, מיינט נישט, אַז מע קען זיך לאָזן וווילגיין און טרינקען וויפֿל מע וויל, ווײַל די קינסטלעכע צוקערס האָבן זייער אייגענע ריזיקע, בפֿרט אין די נירן. דאָס איז נישט בלויז אַ פּראָבלעם פֿאַר די טרינקער פֿון דיעטישער סאָדע, אָבער אויך פֿאַר די מענטשן, וואָס טרינקען קאַווע אָדער טיי פֿיר מאָל אַ טאָג, און יעדעס מאָל — „באַצוקערט‟ מיט 3־4 פּעקלעך קינסטלעכע זיסמיטלען, ווי Equal, Sweet & Low און אַנדערע.

דאָס בעסטע פֿון אַלץ איז בכלל זיך אָפּגעוויינען פֿון סאָדע, און טרינקען געזינטערע, מער נאַטירלעכע געטראַנקען ווי וואַסער, מילך און פֿרוכטזאַפֿט.


Back to נײַעס פֿאַר בני־בית