No Place Like Home
March 1, 2013, 12:38pm

מיטללענדישער טונפֿיש־סאַלאַט

Mediterranean Tuna Salad

פֿון שׂרה־רחל שעכטער

  • Print
  • Share Share

לויט דער מיטללענדישער דיעטע, וואָס מע האָט לעצטנס געלויבט אין די צײַטונגען, דאַרף מען אײַננעמען, צום ווייניקסטן, 4 לעפֿל איילבערט־בוימל אַ טאָג. דערפֿאַר דאַרפֿט איר זיך נישט זאָרגן, וואָס דער סאַלאַט איז געמאַכט פֿון 1/4 טעפּל איילבערט־בוימל.

אַ דאַנק דעם טונפֿיש, האָט דאָס מאכל אַ הויכן פּראָצענט פּראָטעיִן; און צוליב דעם פּיקאַנטן טעם פֿון די אַרטישאָקן, מאַסלינעס און קנאָבל, וועט אײַך אַפֿילו נישט אויספֿעלן זאַלץ.

12 אונץ (340 גראַם) טונפֿיש

6 אונץ (170 גראַם) אַרטישאָקן־הערצעלעך, צעשניטן

1/2 טעפּל צעשניטענע מאַסלינעס

4 טעפּלעך אָפּגעקאָכטע מאַקאַראָני

4 פּאָמידאָרן, צעשניטן

3 ציינדלעך קנאָבל, צעהאַקט

1/2 טעפּל צעמאָלענער פּאַרמעזשאַנער קעז

1/4 טעפּל לימענע־זאַפֿט

2 לעפֿל רויטער ווײַן־עסיק

1/4 טעפּל איילבערט־בוימל

1 לעפֿעלע אָרעגאַן

שוואַרצער פֿעפֿער, לויט אײַער געשמאַק

זיפּט אָפּ דאָס וואַסער פֿונעם טונפֿיש, די אַרטישאָק־הערצעלעך און די מאַסלינעס. גיט עס אַלץ אַרײַן אין אַ גרויסער שיסל, אין איינעם מיט דער געקאָכטער מאַקאַראָני, פּאָמידאָרן, קנאָבל און קעז. מישט עס גוט אויס.

אין אַ קלענערער שיסל, קאָמבינירט דעם לימענע־זאַפֿט, עסיק, בוימל, אָרעגאַן און שוואַרצן פֿעפֿער. באַגיסט דעם טונפֿיש־סאַלאַט מיט דעם סאָוס, און דערלאַנגט צום טיש מיט פֿרישן ראַזעווען ברויט.


Back to נײַעס פֿאַר בני־בית